خود هدي معاك

حتا واحد مغادي يعرف مشاكلك و ضغوطاتك  النفسية ، لا داركم ولا صحابك و لا حتا ناس الي كتبغي ،  صحابك معارفينش كيف دايرا علاقتك الحقيقية  مع داركم و حتا داركم معارفينش كيف دايرا علاقتك مع صحابك وخا هما كيحاولو يفهمو ديك العلاقة من خلال تصرفاتك السطحية مي مغيفهموهاش كيف فاهمها نتا ، و تصرفاتك فالدار ماشي فحال تصرفاتك فالزنقة او مع صحابك او مع حبيب(ت)ك ...
بلا متحاول دير فيها عميق و تقول مع راسك انك تقدر تفهم بنادم ، حيت الإنسان من ضهور الفلسفة و الفلاسفة كيحاولو يفهموه و مفهموهش حيت بنادم  مركب تركيبة  معقدة ... و قبل متعاتب او تحاسب او تقول شي هضرة فشي حد خصك تراعي ليه شويا حيت نتا اصلا معارفش كميةالخذلان الي تعرض ليها فعلاقتو  من قبل ، صحابك الجدد معرفنيش كيف كانت علاقتك مع صحابك القدام و صحابك القدام مشاو ومعرفينكش كيف داير دبا ،، بنادم كتلة معقدة و عوض متجي تعاتب شي حد و تجبد ليه  عيوبو ، عاونو يتجاوزها و يصلحها و خدم النصيحة بطريقة لبقة و تصنع انك تعيش معه نفس الحالة ( وخا مغتعيشهاش كيف عايشها هو ) ... كلنا عندنا انشغلات و هموم و كل واحد مسطير عليه تفكيرو الخرواني
كل واحد فينا مللي كايحط راسو فالمخدة  كايبقى يفكر و يحلم و نتا فهاد التفكيير لدرجة انك كتحس  بدمعات حارين و سخااان نزلو على خدودك .شحال صعيبة تحس باحاسيس و انت معارفش علاش!! واش على ايامك لي غاديا بسرعة البرق!! و لا على حياتك لي من نهار حليتي عينيك حلفات لبغات تقاد !! و لا على احلامك لي كتنازل عليهم واحد بواحد!! اولا على نفسك لي حملتيها فوق من طاقتها!! و لا على ذنوبك او بعدك على لي خلقك!! او لا على واليديك ألي مزال كيتسناو منك تفرحهم !! ولا على الثقة لي دايرين فيك بزااف د ناس او مراهنين عليك او انت كتشوف راسك متستاهلش!! ولا على قلبك لهشيش لي مجرجرك و راه او ديما خالق ليك المشاكيل من كثرة الطيبة الزايدة!!! و لا على نفسك الحارة او غرورك او كبريائك لي واخا كل هاد الصراعات او الضغوطات لي كتعيشها الا انها كتجبر تبقى ديما ثابت او قوي قدام الناس اما لداخل ديالك الله لي عالم بيه
تعيا تفكر علاش دموعك نازلين او متعرفش علاش و فلخر غادي تلقا بأن البلاد الي عايشين فيها هي السبب د كلشي